Կրկին Արցախի հարցում ստեղծված իրավիճակի և լուծումների վերաբերյալ

Վերջին օրերին էլ ավելի է ծանրացել Արցախում շրջափակման մեջ գտնվող Հայաստանի Հանրապետության քաղաքացիների վիճակը։

Այսպես կոչված «ռուսաստանցի խաղաղապահները» չեն կատարել և շարունակում են չկատարել 2020թ․ նոյեմբերի 9-ի չարաղետ եռակողմ հայտարարությամբ իրենց ստանձնած հանձնառությունները։

Այսուհանդերձ, միգուցե հենց այդ պատճառով, արցախցի մեր հայրենակիցներն ավելի սթափ են սկսել գնահատել իրավիճակը և ձեռնարկում են որոշակի քայլեր, որոնք նպատակաուղղված են իրենց և իրենց հարազատների կյանքերի և մարդու իրավունքների պաշտպանությանը, Արցախի ապաշրջափակմանը և իրավիճակի կայունացմանը։

Հաշվի առնելով ստեղծված իրավիճակը` Ազգային- ժողովրդավարական Բևեռը հարկ է համարում մեկ անգամ ևս բարձրաձայնել իր դիրքոոշումը․ Արցախում ցանկացած խաղաղապահ գործունեություն պետք է բովանդակությամբ լինի միջազգային ու բազմազգ և խարսված պիտի լինի ոչ թե ալիևյան ռեժիմի բարեհաճության, այլ միջազգային արդար հարաբերությունների հենքի և միջազգային իրավունքի կայուն հիմքի վրա։

Ըստ այդմ, Ազգային-ժողովրդավարական Բևեռը գտնում է, որ Արցախի հայությունը պետք է տեր կանգնի իր իրավունքներին ու հոծ զանգվածներով միջազգային համայնքից պահանջի նրա առավել ներգրավումը Արցախի ճակատագրում, ինչպես նաև միջազգային խաղաղապահների տեղակայումը Արցախում։

Ազգային-ժողովրդավարական Բևեռն իր բոլոր հնարավորություններով ու միջոցներով կաջակցի այդ պահանջներին և կանի ամեն ինչ, որպեսզի այդ պահանջները շուտափույթ իրականություն դառնան։

Ազգային-ժողովրդավարական Բևեռի խորհուրդ,

13 հուլիսի, 2023թ․, ք․ Երևան